AZƏRBAYCAN DAVOSU-u

AZƏRBAYCAN DAVOSU-u

       Bu ilin əvvəlində Azərbaycanın mütəmadi şəkildə, ən yüksək səviyyədə qatıldığı Davosda keçirilən növbəti Dünya İqtisadi Forumunda ölkəmiz üçün çox böyük əhəmiyyətə malik olan ümumi bir

razılıq da əldə edildi. Bu razılığa əsasən aprel ayının birinci ongünlüyündə Davos Dünya İqtisadi Forumu ölkəmizdə  keçiriləcəkdir.

      Dünya ictimaiyyətinin, iqtisadçı ekspertlərin böyük maraqla izlədiyi Davos Forumuna əsasən  dünyada tanınan biznes adamları, biznes kompaniyalar, siyasi liderlər, görkəmli ziyalılar və ən əsası müasir zaman üçün böyük gücə malik olan aparıcı jurnalistlər dəvət edilirlər. Belə bir tərdbirin ölkəmizdə keçirilməsi dövlətimizin müəyyən etdiyi gələcək inkişaf məqsədlərinə böyük tövhə verəcəkdir. Ölkə Prezidenti cənab İlham Əliyev çıxışlarının birində qeyd etmişdir ki, “Bizim əsas məqsədimiz güclü, dayanıqlı, uzunmüddətli iqtisadi inkişafı təmin etmək, insanların rifah halını yaxşılaşdırmaq, Azərbaycanda sosial məsələlərin həlli üçün bütün lazımi tədbirləri görməkdir. ”

       Bu məqsədlərə nail olmaq üçün təbii ki, dayanmadan çalışmaq, dünyanın və əsas investorların diqqətini Azərbaycana yönəltmək lazımdır. Bunun üçün kifayət qədər əsaslar da vardır. Belə ki, bu gün ölkəmiz dünya dövlətləri arasında sabit kredit reytinqinə malik olan dövlətdir, etibarlı məkandır.

Azərbaycanın bütün sprektrlərdə dünyaya inteqrasiya olunması üçün belə beynəlxalq forumların böyük əhəmiyyəti həm də ondadır ki, Azərbaycan təkcə regionun deyil, Avropanın və dünyanın ayrılmaz bir parçası olmaq gücünü ortaya qoyur.

      Azərbaycan Davosu təkçə Cənubi Qafqazın deyil, Orta Asiyanın da gələcək iqtisadi ikişafı üçün böyük imkanlar aça biləcək. Bu regionların Qərbə daha sürətli iqtisadi inteqrasiyasına səbəb olacaqdır.

Yanvar ayında keçirilmiş Forumda bütün diqqətlər  əsasən dünya  iqtisadiyyatının inkişafı, davamlı iqtisadiyyat, beynəlxalq maliyyə sisteminin stabilliyinin əldə edilməsi, enerji təhlükəsizliyi, ekoloji və sağlamlıq problemlərinin həllinə yönəlmişdi. Azərbaycanda keçiriləcək növbəti Forumda isə əsas istiqamət Cənubi Qafqaz və  Orta Asiya ölkələrinin gələcəyi, inteqrasiya, təhlükəsizlik, enerji layihələri və digər məsələlər müzakirəyə çıxarılacaqdır. Bu iki mühüm regionun problemlərini əhatə edəcək bir Dünya Forumunun Azərbaycanda keçirilməsi və bunun da Fond rəhbərliyinin təklifi əsasında dövlətimiz tərəfindən təşkil olunması çox mühüm hadisədir.  

        Dövlətimizin əsas məqsədi yüksək iqtisadi inkişafa nail olmaqla mövcud problemləri həll etmək və ölkənin davamlı inkişafını təmin etməkdir. Hazırda ölkəmiz bu istiqamətdə Cənab Prezidentimiz İlham Əliyevin uğurlu siyasət strategiyasına əsasən öz uğurlu yoluna davam etməkdədir. Bu uğurun sirri Heydər Əliyevin yaratdığı milli dövlətçilik siyasətinə sədaqətdir, bu siyasətin zamanamüvafiq davam və inkişaf etdirilməsidir.

      Düşünürəm ki, Dünya Birliyi ilə sıx əməkdaşlıq edən Ölkəmizdə mötəbər Davos Dünya İqtisadi Forumunun keçirlməsi Azərbaycanın bütün sahələrdə qazandığı uğurlara verilən dəyərdir.

Sərraf Balaxan