Susmaq qızıldır – müxalifətin pul qazandıran sükutu

Susmaq qızıldır – müxalifətin pul qazandıran sükutu

Bir həftədir ki, ölkə ictimaiyyəti, əhli-kitab Əkrəm Əylislinin 7 il öncə ifa etdiyi, lakin səsi indi çıxan “erməni nəğməsi”nin

sədaları altındadır. Azərbaycanın ictimai, siyasi, elmi, mədəni həyatında  böyük nüfuz və hörmət sahibi olan insanlar bu “nəğmə”nin ifaçısını sərt şəkildə qınamışlar. Mövqelər bütün çılpaqlığı ilə ortadadır.

Bu “erməni nəğməsi”ndə Azərbaycan xalqının və dövlətinin böyük hörmət bəslədiyi, əsərləri sevə-sevə oxunulan bir şəxsin – Əkrəm Əylislinin xalqımıza və düşmən erməniyə olan münasibəti ən azından dərin təəssüf  doğurur.

Milli kimliyini dərindən anlayan, uzaq deyil, son 25 illik tarixini bilən hər kəs bu mətni oxuduqdan sonra Çingiz Mustafayevin “üzünü göstər, üzünü” deyə hıçqırdığı lenti göz önünə gətirərək “nəğməkar”a “sənin ... ...” deyə ünvanlanacağından əminəm.

Bu mətndə insan faciəsi fərdi deyil, toplum kontekstindən göstərilib. Azərbaycanlılar dili kəsilmiş qatillər kimi təqdim edilib, o qatil ki, savaşının səbəbini anlada bilməyəcək.

İlk baxışdan müəllif aldadılmış kimi görünür. Bu bəlkə də bizim “ola bilməz” məntiqimizin əlamətidir. Lakin sonradan verilən açıqlamalar, “nəğməkar”ın bu vətəni qarış-qarış, insan-insan, söz-söz erməniyə satdığını ortaya qoyur. Prinsip də necə olsa yaxşıdır, belə: “Mən etiraf etdim, qoy onlar da etiraf etsin.”

Əcəb gülməlisən, xaniman xərab.

Bu anda sükutu ilə pul qazananlar da var. Azərbaycanda özünü müxalifət adlandıran bəzi bəzilər. Ortada milli mənafeyə, milli marağa, milli ideologiyaya zərbə vuran iyrənc, hətta bədii həllini belə tapmayan mətn, saxta mənbə, cəllad, uşaq qatili erməninin məsumiyyəti və özünü Azərbaycanlı adlandıran bəzilərinin yersiz sükutu.

Hər xırda məsələni belə böyüdüb filə döndərən, iki gündən bir İPə düzülən, toplantı keçirib birgə bəyanat yayan “qəhrəmanlar” indi niyə susub?! Razıdırlarmı Əkrəm Əylisli ilə?

Bəlkə, Xocalıda vəhşicəsinə qətl edilən 63 uşağın parçalanmış cəsədini görməyiblər, bəlkə, ailəsinin gözü qarşısında diri-diri yandırılan insanların bağırtısı duymayıblar?!

Həm görüblər, həm də duyublar, bu tam dəqiqdir. Bunların fonunda bir dəqiqlik də var, onlar bu sükutları ilə milli kimliklərini hakimiyyət hərisliyininə, pul ehtirasına, vədlərə satıblar. Həqiqət bundan ibarətdirsə, sükutun pul maşını yaxşı işləyir demək.

Susun, susun! Susmaq bu məqamda sizlərçün həqiqətən qızıldır.

Sərraf Hüseynov

sbalaxan@gmail.com