Ovqat şeirləri...

YADIMA DÜŞÜRSƏN

  

Yadıma düşürsən-

Ömrün bu çağında, bu vədəsində,

Tələbə dostların əhatəsində,

Mənimçün hər zaman cilov gəmirən

Xamgir imtahanlar məngənəsində,

Dan üzü gördüyüm yuxular kimi.

Yadıma düşürsən-

Qapısın döydüyüm qərinələrin,

Sirri açılmamış dəfinələrin,

Od-alova təşnə pərvanələrin

Məndə yaratdığı duyğular kimi.

Yadıma düşürsən, düşürsən ki Sən,

Hopduram çiçəyə-gülə sevgimi,

Gözəllər qoxlaya bilə sevgimi,

Bülbüllər gətirə dilə sevgimi.

Düşəm ağızlara,düşəm dillərə,

Bu da bir yük ola çiyinlərimə,

Sancıla yaxama qayğılar kimi.

                      

İÇİMDƏKİ TANRI

Yağır yağış,

Göyərir əllərin,

Uzanır mənə sarı

İndi daha sakit və arxayın görünür –

İçimdəki Tanrı.

Fatma nənə yer üzünə

Bir əbədi səbətbağı –

Göy qurşağı

Toxuyarsa,

Ən uzun yollar da beləcə

Göyərər,

Uzanar

Addım səslərinə,

Sonunda gözləyən varsa.

Sərraf Balaxan

sbalaxan@gmail.com