DOĞMA QARABAĞIM

DOĞMA QARABAĞIM

Azərbaycan Respublikası Prezidenti yanında Gənclər Fondu Qarbağ həqiqətlərinin dünyaya çatdırılması, yurd-yuvasından qaçqın düşmüş gənclərin problemlərinin həlli istiqamətində bir çox layihələrə dəstək olmuşdur.

Belə layihələrin növbətisi “Doğma Qarabağım” gənclərin

yaradıcılıq festivalıdır. Bu layihə əsasən qaçqın məktəblərində oxuyan yeniyetmə və gənclərin Qarabağla bağlı çəkdikləri rəsmlərin, hazırladıqları əl işlərinin ölkə ictimaiyyətinin və ölkəmizdə fəaliyyət göstərən səfirliklərin, beynəlxalq təşkilatların diqqətinə çatdırılması işini həyata keçirəcəkdir.

Layihənin ideya müəllifi və rəhbəri Sərraf Hüseynovun bildirdiyinə görə, layihənin əsas məqsədi öz doğma torpaqlarından didərgin düşmüş yaradıcı və istedadlı gənclərin üzə çıxarılması, onlara öz yaradıcılıq imkanlarını genişləndirmək üçün dəstək göstərilməsi və bu gənclərin yaradıcılıq nümunələri vasitəsi ilə Qarabağın tarixi Azərbaycan torpağı olmasını, Qarabağ münaqişəsində Azərbaycanın haqq səsini festival iştirakçılarının və digər ictimaiyyət nümayəndələrinin diqqətinə çatdırmaqdan ibarətdir.

Azərbaycan Respublikasının Prezidenti cənab İlham Əliyevin söylədiyi “Vətənpərvərlik olmadan heç bir ölkə inkişaf edə bilməz. Vətən sevgisi, Vətənə və xalqa olan bağlılıq - inkişafı bu amillər stimullaşdırır. Ona görə, gənclərimiz vətənpərvərlik ruhunda, milli ruhda tərbiyə olunmalıdırlar” sözləri layihəmizin əsas qayəsini və sütununu təşkil edir.

“Doğma Qarabağım” gənclərin yaradıcılıq festivalı layihəsi erməni qəsbkarları tərəfindən 20 ildən artıqdır ki, öz doğma yurd-yuvasından didərgin salınmış istedadlı gənclərin yaradıcılığını nümayiş etdirmək, onların doğma yurdlarına olan sevgisini və o torpaqlara dönmək istəyini ictimaiyyətə, xüsusən ölkəmizdə fəaliyyətdə olan beynəlxalq təşkilat nümayəndələrinə, səfirliklərin əməkdaşlarına təqdim etmək niyyətindədir.  

Bakı şəhərində, şəhərətrafı kəndlərdə, ölkəmizin regionlarında yaşayan bu gənclərin müəyyən olunması, onların yaradıcılıq nümunələrinin toplanması, şeir və hekayələrin çap edilməsi,  bütün yaradıcı gənclərin festivala gətirilməsi əsas görəcəyimiz işlərdir.

Məqsədimiz doğma yurdundan qaçqın düşən bu gənclərin vasitəsi ilə ölkəmizdə olan xarici nümayəndələrə Qarabağın əbədi və əzəli Azərbaycan torpağı olduğunu daha təsirli şəkildə yenidən çatdırmaq, ölkə gəncliyini Qarabağa zəfər yürüşü əhval-ruhiyyəsində saxlamaqdır.

Artıq Qərb soyqırıma məruz qalan insan cəsədlərinə, kəsik başlara, qətl edilən körpələrin məsum simasına baxmır. Bu məqamda əsas vasitə mədəniyyətdir. Bizim olan Qarabağ mədəniyyəti ilə biz öz haqq səsimizi daha yüksəklərə ucalda, Qarabağın bizim doğma ata-baba torpaqlarımız olmasını əsas söz sahiblərinə isbatlaya bilərik.

Gənclərimizin xüsusən işğal altında olan torpaqlardan qaçqın düşən gənclərin milli ruhda tərbiyə olunması çox vacib və aktual məsələdir. Bu mənada istedadlı gənclərin öz doğma torpaqları haqqında yaratdıqları incəsənət nümunələrini nümayiş etdirmək, onları bir araya gətirmək, yaradıcılıqlarını stimullaşdırmaq çox önəmli məsələdir.

Düşünürük ki, layihəmiz yaradıcı və xüsusi istedada malik olan gənclərin ictimaiyyət tərəfindən tanınmasına, onlarda milli vətənpərvərlik ruhunun daha da yüksəlməsinə, öz üzərlərində daha əzmlə çalışmalarına, yeni istedadaların üzə çıxmasına böyük dəstək olacaq, onlara stimul verəcəkdir.